वाक शिवारात महसूल प्रशासनाचा धडक छापा: ७ डंपर, २ जेसीबीसह ३ ट्रॅक्टर जप्त; तहसीलदारांच्या कारवाईने वाळूमाफियांचे धाबे दणाणले

भडगाव :- तालुक्यातील मौजे वाक शिवारात सुरू असलेल्या अवैध वाळू उपसा आणि वाहतुकीवर भडगाव महसूल प्रशासनाने आज सकाळी जोरदार कारवाई केली. तहसीलदार शितल सोलाट यांच्या नेतृत्वाखालील पथकाने आज, दि. ०९ ऑक्टोबर रोजी सकाळी ८ वाजता अचानक छापा टाकून वाळू वाहतूक करणारी तब्बल १२ वाहने जागीच पकडली. जप्त केलेली सर्व वाहने तहसील कार्यालय आवारात जमा करण्यात आली असून, या धडक कारवाईमुळे परिसरातील अवैध वाळू वाहतूकदारांमध्ये प्रचंड खळबळ उडाली आहे.
कारवाईचा तपशील
वाक परिसरात मोठ्या प्रमाणावर विनापरवाना वाळू उपसा व वाहतूक सुरू असल्याची माहिती मिळताच महसूल पथकाने सकाळीच सापळा रचला. या धाडीत अवैध कामात गुंतलेली पुढील वाहने ताब्यात घेण्यात आली:

डंपर: ७

जेसीबी: २

ट्रॅक्टर: ३
ही सर्व वाहने तात्काळ जप्त करून पुढील कायदेशीर कारवाईसाठी भडगाव तहसील कार्यालयाच्या आवारात सुरक्षितरीत्या आणून जमा करण्यात आली आहेत. संबंधित वाहनमालक व चालकांवर नियमानुसार दंडात्मक तसेच कायदेशीर कारवाईची प्रक्रिया सुरू करण्यात आली आहे.
कारवाईत सहभागी अधिकारी व कर्मचारी
सदर मोहीम तहसीलदार शितल सोलाट यांच्या प्रमुख मार्गदर्शनाखाली राबविण्यात आली. या पथकात पुढील अधिकारी व कर्मचाऱ्यांचा सहभाग होता:

मंडळ अधिकारी: कुणाल कोळी (भडगाव)

महसूल सहाय्यक (म.स.): पंकज भागवत, भूषण मराठे, महादू कोळी, हर्षल भदाणे

ग्राम महसूल अधिकारी: अनिता सुतार, गौरव पगारे, गितेश महाजन, विवेक महाजन, प्रसाद दुसुस्कर, योगेश पाटील

महसूल सेवक: विशाल सूर्यवंशी, अमोल पाटील, किरण मोरे
तालुक्यात अनधिकृत गौण खनिज उत्खनन किंवा वाहतूक करणाऱ्यांवर यापुढेही अशीच कडक नजर ठेवली जाईल आणि कोणाचीही गय केली जाणार नाही, असा स्पष्ट इशारा प्रशासनाकडून देण्यात आला आहे.