पाचोरा गुन्हे प्रतिबंधक शाखेची कारवाई भुसावळच्या तरुणाकडून 6,780 रुपयांचा प्रतिबंधित गुटखा जप्त; एकास अटक

पाचोरा, जि. जळगाव, दि. 06 जुलै 2026 : महाराष्ट्रात प्रतिबंधित असलेल्या सुगंधित तंबाखूची विक्री करणाऱ्या एका इसमाला पाचोरा पोलीसांच्या गुन्हे प्रतिबंधक शाखेने अटक केली आहे. त्याच्याकडून एकूण 6,780 रुपये किमतीचा केसरयुक्त विमल पानमसाला आणि V1 तंबाखू जप्त करण्यात आला आहे.

घटनाक्रम असा
पाचोरा पोलीस स्टेशन येथे कार्यरत पो.कॉ. श्रीराम अनिल शिंपी व पो.हेकॉ. राहुल काशिनाथ शिंपी हे दोघे दि. 05/07/2026 रोजी सायंकाळी 6:00 वाजता खाजगी वाहनाने पाचोरा शहरात गुन्हे प्रतिबंधक गस्त घालत होते.

सायंकाळी 7:00 वाजण्याच्या सुमारास रेल्वे भुयारी मार्गाजवळ, छत्रपती शिवाजी महाराज चौकाकडे जाणाऱ्या रोडवर त्यांना एक काळा शर्ट घातलेला आणि पाठीवर काळी बॅग असलेला इसम संशयास्पदरित्या फिरताना दिसला. पोलिसांनी त्याला थांबवून चौकशी केली असता त्याने उडवाउडवीची उत्तरे दिली.

जप्त केलेला मुद्देमाल
संशयावरून त्याची बॅग तपासली असता त्यात खालील प्रतिबंधित साहित्य आढळून आले:

1. केसरयुक्त विमल पान मसाला: 10 जांभळ्या रंगाची पाकिटे, एकूण किंमत ₹1,980
2. केसरयुक्त विमल पान मसाला: 25 हिरव्या रंगाची पाकिटे, एकूण किंमत ₹4,400
3. V1 तंबाखू: 20 पाकिटे, एकूण किंमत ₹400

एकूण जप्त मुद्देमालाची किंमत: ₹6,780

आरोपीचे नाव
पोलीसांनी ताब्यात घेतलेल्या इसमाचे नाव सैय्यद सैफ अली सैय्यद अकबर अली, वय 26 वर्षे, रा. इमलीपुरा, जाम मोहल्ला, नॅशनल गर्ल शाळेजवळ, भुसावळ, ता. भुसावळ, जि. जळगाव असे आहे.

कायदेशीर कारवाई
सदर कारवाई महाराष्ट्र राज्याचे अन्न व औषध प्रशासन आयुक्त यांचा आदेश क्रमांक – असुमाअ/अधिसुचना-411/2025/7, दि. 16/07/2025 नुसार करण्यात आली. या आदेशानुसार दि. 20/07/2025 पासून महाराष्ट्रात गुटखा, पानमसाला, सुगंधित तंबाखू यांचे उत्पादन, साठा, वाहतूक आणि विक्रीवर पूर्णपणे बंदी आहे.

पो.हेकॉ. राहुल शिंपी यांनी मा. पो.नि. राहुलकुमार पवार यांना घटनेची माहिती दिल्यानंतर, दोन स्थानिक पंचांच्या उपस्थितीत ई-साक्ष ॲपद्वारे पंचनामा करून सर्व मुद्देमाल जप्त करण्यात आला. आरोपीविरुद्ध पाचोरा पोलीस स्टेशन येथे गुन्हा नोंद करण्यात आला असून पुढील तपास सुरू आहे.

पोलीसांचा इशारा: प्रतिबंधित गुटखा/पानमसाल्याची वाहतूक किंवा विक्री करणाऱ्यांवर कठोर कारवाई केली जाईल, असे पाचोरा पोलीसांनी कळवले आहे.