अमळनेरात लोककलेचा जागर; 85 बालकलाकारांचा उत्स्फूर्त सहभाग

अमळनेर :- महाराष्ट्राच्या मातीतील समृद्ध सांस्कृतिक वारसा असलेल्या लोककलांना नवसंजीवनी देण्यासाठी अमळनेरात एक प्रेरणादायी उपक्रम राबविण्यात आला. मराठी वाङ्मय मंडळ, अमळनेरच्या अमृत महोत्सवी वर्षानिमित्त बालरंगभूमी परिषद, जळगाव जिल्हा शाखा व मराठी वाङ्मय मंडळाच्या संयुक्त विद्यमाने आयोजित लोककला प्रशिक्षण शिबिरात शहरातील विविध शाळांमधील तब्बल 85 बालकलाकारांनी उत्स्फूर्त सहभाग नोंदविला.

लोककला म्हणजे काय?

लोककला ही महाराष्ट्राच्या लोकजीवनाची ओळख आहे. पोवाडा, भारूड, गोंधळ, लावणी, वासुदेव, दशावतार, धनगरी गजी अशा विविध लोककलांच्या माध्यमातून समाजप्रबोधन, इतिहासाचे जतन आणि मनोरंजन केले जाते. काळाच्या ओघात लोप पावत चाललेल्या या कला नव्या पिढीपर्यंत पोहोचविणे आणि त्यांचे संवर्धन करणे काळाची गरज बनली आहे.

याच उद्देशाने या शिबिराचे आयोजन करण्यात आले होते. लोककलेचा समृद्ध वारसा नव्या पिढीपर्यंत पोहोचविणे, बालकलाकारांना विविध लोककलांची ओळख करून देणे आणि त्यांच्या सुप्त कलागुणांना हक्काचे व्यासपीठ उपलब्ध करून देणे हा या उपक्रमाचा प्रमुख उद्देश होता.

या कार्यक्रमाचे उद्घाटन मराठी वाङ्मय मंडळाचे सांस्कृतिक समिती प्रमुख डॉ. रवींद्र कुलकर्णी यांच्या हस्ते झाले. मंडळाचे संचालक संदीप घोरपडे यांनी प्रास्ताविकातून शिबिरामागील भूमिका व उद्देश स्पष्ट केला.

यावेळी लोककला क्षेत्रात कार्यरत असलेले शाहीर विनोद ढगे, शाहीर नाना पाटील, सचिन महाजन, मोहित पाटील, हर्षल पवार व अवधूत दलाल यांचा सत्कार मंडळाचे संचालक बन्सीलाल भागवत व सौ. वसुंधरा लांडगे यांच्या हस्ते करण्यात आला.

कार्यक्रमास बापूराव पाटील (ठाकरे सर), प्रशांत कापडणे सर व सौ. शीला पाटील यांची प्रमुख उपस्थिती होती. मंडळाचे अध्यक्ष डॉ. अविनाश जोशी यांच्या प्रेरणेतून व संचालक मंडळाच्या सहकार्याने आयोजित या उपक्रमाला अमळनेरातील सर्वच शाळांनी उत्स्फूर्त प्रतिसाद दिला.

कार्यक्रमाचे सूत्रसंचालन मंडळाचे कार्यवाह भैय्यासाहेब मगर यांनी केले, तर यशस्वीतेसाठी ग्रंथपाल हेमंत बाळापुरे व जगदीश कुलकर्णी यांनी विशेष परिश्रम घेतले.

लोककला, संस्कृती आणि बालप्रतिभेचा सुंदर संगम घडविणाऱ्या या उपक्रमामुळे अमळनेरच्या सांस्कृतिक क्षेत्रात एक सकारात्मक आणि प्रेरणादायी पाऊल पडले आहे.